طراجي واد قنار

واد قنار كينتمي لإقليم شفشاون وبالضبط خميس مذيق "خميس لوطا" وبالقرب من مدينة السطيحات لي كتبعد علي تارغة ب 11kmهاد مكان رائع بمعني كلمة الماء عدب، وطبيعة جد رائعة وخلابة التي تكسوها حقول القنب الهندي من كل مكان.

بلاصة واعرة وكتستاهل زيارة من حيت مزال نقية

طراجي واد قنار

باش تمشي واد قنار خصك تمشي من تطوان واد لو بشي 6دراهم تقريبا من محطة غادي تقطع شانطي وتبقا طلاع وكتطلع غادي تلقا طوبيس واد لو منين توصل واد لو من بعد تشد طاكسي بوحمد بشي 12dh ولا تقدر تمشي قاع ساس بحر مبيهش قبل متوصل بوحماد غتهبط في رومبا لي كتدي لخميس المديق(خميس لوطا) راهم كاين خطافا وطاكسيات منين توصل لخميس لوطا غادي تشدها علي رجليك لواد قنار شي ساعة ونصف ديال طريق راه باينة ولكن صعيبة شويا كاين هبطات بزاف ويلا مشديت راسك مشتي

يلا بغيتي تمشي من بوحمد لواد قنار ديركت ب 23dh علي طريق ديال واد في 207 ويلا بغيتي تمشي علا رجليك خاصك تهبط فقنطرة لي قبل من رومبا ديال خميس مديق راك تلقا واحد بلاكا مكتوبا فيها واد قنار وتبقا طالع مع لواد شي 3 ديال سوايع كلها مناضر واعرة وغا لقنب هندي داير بيك.

بالنسبة لي باغي يمشي فطرونسبور وعندو فوبية من مرتفعات نصيحة بلا متركب حدا شوفير لأنك غادي تشعر بواحد رعب خيالي غا تبقي غا كتشهد طريق خطيرة بزاف بالنسبة لي عندهم سيارة غادي نتكلم عليهم حتا لتالي.

منين توصل واد قنار موجود فين طونتي وثمن هو 10 دراهم لواحد مشي طونط وبلا متحاول متخلصهاش راهم ميتفهموش معاك.

غادي توصل رتاح و دير شي دكيكة معا راسك خلي بكطاج ديالك وطونط راه مكاينش لي ليدلك شي حاجة هداك لي مريح عندو راه يحضيلك كولش لمهم سول علي لبيسن واحد بلاصة مجموع فيها ماء ونقي غادي تسمتع فيها بسباحة وكاين فين تنقاز وتقفز من بعد سول علي كهف سياح واحد غار كيخرج من ما بارد بزاف.

ويلا قدتي تكمل لشلال كبير كمل وخا طريق صعيبة ولماء كيدر بلك تا لصدر ومعندكش شي طريق مغير تمشي فالماء وطريق غدا وكتصعاب ولكن منين توصل غدي تحس بواحد شعور فشكل.

رد بال معا قرودة راهم كيلحو عليك حجر من فوق

بالنسبة لي باغي يمشي بسيارة طريق صعيبة من خميس لوطا لواد قنار عندك سيارة لاصقة في للأرض بلا متحاول حطها ف باركينغ ومن تما شد طريق لواد قنار ولا خطاف

يلا كانت عندك سيارة عالية شي شوية بحال لوجان وكنتي كتصوق مزيان تقد تزعم مي هبطة صعيبة وطلعة كتر واقفة كيكون تقل معا طلعة صعيبة بزاف.

نصائح ضرورية يجب معرفتها قبل دهاب إلي واد قنار

✓ماكلة خصك تقدها من واد لو ولا من بو حمد من حيت خميس لوطا قليل فيه حوانت إلا نهار خميس كيكون سوق وفواد قنار راه دكشي غالي بزاف كيحسبو عليك طريق وكلشي.

بغيتي تا توصل وعاد تشري هداك لي تبات عندو راه يتكلف بكلشي وخا تمن زايد ولكن يستاهلو طريق صعيبة باش يوصلك داكشي

✓بالنسبة لمبيت كاين واحد في دخلة فين كتحطك 207 كيكون عامر عندو ضو ب10dh لشخص واحد

كتطلع شويا معا واد تلقا ناس مساوين بلايص زوينين أماكن فين تحط طونط كاين ضو طاقة شمسية كنصحك تحط طونط ديالك حدا لبيسن راه كاين بعيد غا شويا من دخلة كتطلع أمتار وكتلقاه واعر بزاف يلا لقتو بلاصة عامر تلقو حداه تماك أماكن زوينة

✓من أحسن تدي معاك شي عصا تكون صحيحة باش تحرك معا واد ولا تنقز من حجرة لحجرة راه تفديك بزاف

✓بالنسبة لحداء مهم خص ضروري يكون حرش من تحت باش ميزلقكش كاين طحالب فوق حجر.

نخليكم معا بعض صور أخري